Nerón Augusto, xunto a Popea, dirixe o Imperio romano, nunha era de esplendor cultural e artístico sen precedentes. Aínda non ten sucesor, pero o seu poder é absoluto. Con todo, no décimo ano do seu reinado, un incendio arrasa a capital do Imperio. Os rumores sobre a relación de Nerón co lume empezan a crear malestar entre o pobo e os políticos. Nerón sabe que o seu destino está ligado ao de Roma e á súa promesa de reconstruíla como a cidade que cegará ao mundo. Pero hai quen ve perigosa a súa gloria e falsos amigos e espías conspiran na súa contra. Nerón sabe que, se sobrevive, será o primeiro membro da súa familia en escapar á rede de traizóns da corte romana. Se non o logra, tamén sabe que é o último da súa dinastía.